გადავწყვიტეთ, ჩვენი გემოვნებით შეგვედგინა გეხბურთში საუკეთესო თერტმეტეული. ოღონდ მხოლოდ 21-ე საუკუნის, რადგან პელეს, კრუიფის, ბეკენბაუერის და სხვა ძველი ლეგენდების თამაში არ გვინახავს და მხოლოდ Youtube-ზე ნანახი ვიდეოებით არ გვინდა განვსაჯოთ ესა თუ ის ფეხბურთელი. ნახეთ ჩვენი 4-3-3 ტაქტიკა და გვითხარით რას შეცვლიდით.

მეკარე - ჯანლუიჯი ბუფონი

არჩევანი, რა თქმა უნდა, ძალიან დიდია. თუმცა ჩვენ მაინც ჯიჯი შევარჩიეთ მეკარის პოზიციაზე. ალბათ, ვერც ვერავინ შემოგვედავება.

მარჯვენა მცველი  - კაფუ

ბრაზილიელი არა მხოლოდ 21-ე საუკუნის, ალბათ ყველა დროის საუკეთესო მარჯვენა მცველია.

ცენტრალური მცველი - ალესანდრო ნესტა

ცენტრალურ მცველებშიც ძალიან დიდია არჩევანი და უბრალოდ გემოვნების ამბავია. ჩვენი აზრით, ნესტა აუცილებლად იმსახურებს სასტარტოში ადგილს. ძნელია გაიხსენო მასზე სტაბილური და საიმედო კაცი დაცვაში.

ცენტრალური მცველი - პაოლო მალდინი

მართალია პაოლომ უფრო ნაკლები სეზონი ჩაატარა 21-ე საუკუნეში, ვიდრე მეოცეში, მაგრამ მაინც აუცილებლად შესაყვანია . ფეხბურთის არსებობის ისტორიაში საუკეთესო მცველია.

მარცხენა მცველი - რობერტო კარლოსი

მართალია, კარლოსი დაცვაში ისეთივე დახვეწილი ვერ იყო, როგორც ზემოთ ნახსენები მცველები, მაგრამ მისი ქარიზმა, სისწრაფე, დარტყმა, თავდასხმა იმდენად დიდია, რომ, ჩვენი აზრით, 21-ე საუკუნის საუკეთესო მარცხენა მცველია.

საყრდენი ნახევარმცველი - კლოდ მაკელელე

ფრანგი საყრდენი აუცილებლად უნდა იყოს ამ გუნდში. მაკელელემ სხვა დონეზე აიყვანა საყრდენი ნახევარმცველის ფუნქცია-მოვალეობები. დღევანდელ ფეხბურთში, მის პოზიციაზე გუნდში თუ არ გყავს კარგი ფეხბურთელი ძალიან ძნელია თამაშის მოგება.

ნახევარმცველი - ზინედინ ზიდანი

უბრალოდ, ვერ წარმოგვიდგენია ოცნების 11-ეული ზიდანის გარეშე. მახსოვს, ბურთს რომ მიიღებდა, აუცილებლად მწვავდებოდა თამაში. თან არ მახსოვს, მას როდესმე ფლობა დაეკარგა, ვინმეს წაერთმია. გენიოსი.

ნახევარმცველი - ანდრეს ინიესტა 

ბოდიში ყველა გენიალურ ნახევარმცველს, ძალიან დიდი არჩევანია, ლამპარდი, ჯერარდი, ტოტი და ა.შ, მაგრამ დონ ანდრესი უნდა შევიყვანოთ სასტარტოში. გუარდიოლას ბარსელონას ლიდერი, გუნდის, რომელიც ყველა დროის ერთ-ერთი საუკეთესოა, თუ საუკეთესო არა.

მარჯვენა ფრთა, თავდამსხმელი - ლიონელ მესი

ეს არჩევანი, ალბათ ყველაზე მარტივია. არსებობს ფეხბურთის  გულშემატკივარი ვინც ლეოს არ შეიყვანს თავის თერთმეტეულში? არამგონია. 

კრისტიანო რონალდო

ათლეტი, რომელსაც უკლებლივ ყველა დამწყებმა ბავშვმა-სპორტსმენმა უნდა მიბაძოს. გოლების მანქანა. დღევანდელ ჩაკეტილ და მოსაწყენ ფეხბურთში, კრისტიანო საერთოდ სხვა სპორტს თამაშობს. არა მხოლოდ, 21-ე საუკუნის, რონალდო ყველა დროის ერთ-ერთი საუკეთესოა.

ცენტრალური თავდამსხმელი - რონალდო

ფეხბურთელი, რომელსაც ყველაფერი ჰქონდა. დრიბლინგიდან დაწყებული, თავით თამაშამდე დამთავრებული. რონალდოს ბრაზილიის 9 ნომრიანი მაისური ყოველი ბავშვის თაროს ამშვენებდა. ფენომენი!

მეკარე: ბუფონი

მცველები: კაფუ, მალდინი, ნესტა, კარლოსი

ნახევარმცველები: მაკელელე, ზიდანი, ინიესტა

თავდამსხმელები: მესი, რონალდო, კრისტიანო რონალდო