რუსეთში საფლავის მთხრელების ტურნირი ჩატარდა
თუ ევროპაში ერთ თვეში ევროპის ჩემპიონატი დაიწყება, რუსეთში, ქალაქ ნოვოსიბირსკში საფლავის მთხრელების კონკურსი გამართეს. შეჯიბრი თურმე ყოველწლიური ყოფილა.
პირველ ადგილზე გავიდა დუეტი ომსკიდან, რომლებმაც საფლავი რეკორდულ დროში, 38 წუთში გათხარეს. აზარტულ მთხრელებს 400 დოლარი გადაეცათ.
კონკურსის მიზანია ამ საქმიანობის პრესტიჟის გაზრდა, საფლავების მთხრელთა სამუშაო პროფესიონალიზმის გაუმჯობესება და ამ სფეროში ახალგაზრდების მოზიდვა.
შეჯიბრში გუნდებმა 2 მეტრი სიგრძის, 80 სმ სიგანისა და 160 სმ სიღრმის საფლავი უნდა გათხარონ ისე, რომ მასში კუბოს ჩატევა შესაძლებელი იყოს. სისწრაფესა და პარამეტრების დაცვასთან ერთად, მონაწილეების ტექნიკასა და აკურატულობას აკვირდებიან.
